La Trêma

En patois

En français

Ou pi dou Molèjon è di j’Alpètè, ch’ètsapè d’ouna chourche on galé felè d’ivouè, l’è la Trêma. Avui chapyinthe, i prin liji dè moujâ pê la tyinta vèchera i rèdjindrè la pyanna, ha dè la Grevire ou bin ha dè la Vevéje ? In bèthèyin on bokenè, pou-t-ithre ouna dyindyèta, l’a rèyi dè chobrâ tota gruvèrina. Vinyin di patchi dou Tsavô-Bourlâ, le ryô dou Mormotê vin li bayi on bokon mé dè tourdze. In pachin pê lè Viyu, l’inbârkè avui li dutrè ryô ke dèchindon di patchi dè la Pitita è dè la Granta Cithare. On bokon pye dèmènadjàja, l’è in grôcha konfyinthe ke felè in kontre Bulo. Chu chon pachâdzo chè tràvè l’anhyan kovin dè la Pâ-Dyu yô, on yâdzo, lè mouêno ch’in chèrvechan po fére a veri la grôcha ràvoua dè lou moulin.

Po charâ on bokon cha nyèrga, di duchèrètè chon j’ou fête è chin li a bayi di galé goua du lètyin, avui ouna grôch’invide dè lè rupâ, di balè trêtè rèlukon la farfalanna è le pelèvouè ke virevouton a hyà dè l’ivouè. A ruva dè la Trêma, a la frètyà dou matin, dutrè bithè chèrvâdzè vinyon chè dècharâ. Ma, che l’i a adi kôkon ke l’è intrètsantâ dè chi grô ryô, l’è le pètsenê.

Dè tsôtin, che le barô apèdzè cha tsêga chu bi tin, i chè fâ on finô pyéji dè gatoyi lè fenè ganbètè di dutrè j’afriyindàjè damejalè vinêtè, in katson, chè dzubyâ nyuvè din che n’ivouè chépra. Apri hou dutrè bedoumichè, dzoyàja kemin la mayintsèta ou furi, i chè rèbetè in vi.

To pyan, in fajin frontêre intrè Bulo è la Toua, i pâchè a rinda dè l’anhyan Kabarè dou Pon, krijè la route ke, du Bulo, va in kontre l’Intyamon. I koua ouna treya doulon dè la dzà dè Boulêre, pu modè po Bro. In tsemin, l’akrotsè adi l’Èrbivouè ke kàlè du le Molèjon. Fenamintè, a kotyè j’èchtrapâyè dè l’anhyan mohyi dè Bro, i chè mèhyè avui la Charna po ch’in d’alâ in chubyotin vê lè grô j’ochèan.

La Trêma l’è prà galanda, ma… bayidè-vo achyin, kàr di kou i katenè. Adon che vo vêdè la yê ch’inbornâye è le tenêvro ronnâ dè la pâ dou Molèjon, trinâdè pâ tru grantin a cha ruva, pèchke kan chè korohyè, l’è ouna voudêja ke léchè che n’ivouè tsêrêyi pêrè è tron por inpèkalâ to chin ke chè tràvè in travê dè chon yi.

Bèrnâ Chaney

La Trême

Au pied du Moléson et des Alpettes, s’échappe d’une source un joli filet d’eau, c’est La Trême. Avec sagesse, elle prend le temps de réfléchir par quel versant elle rejoindra la plaine, celui de la Gruyère ou bien celui de la Veveyse ? En bégayant un tantinet, peut-être un caprice, elle a choisi de rester toute gruérienne. Venant des pâturages du Cheval Brûlé, le ruisseau du Mormotê vient lui donner un peu plus de fougue. En passant par les Viyu, elle embarque avec elle quelques ruisseaux qui descendent des pâturages de la Petite et de la Grande Cithare. Un peu plus turbulente, c’est en grande confiance qu’elle file en direction de Bulle. Sur son passage se trouve l’ancien couvent de La Part-Dieu où, autrefois, les moines s’en servaient pour faire tourner la grande roue de leur moulin.

Pour freiner un peu son ardeur, de petites chutes ont été faites, et cela lui a donné de jolies mares depuis lesquelles, avec une grande envie de les dévorer, de belles truites lorgnent la libellule et le papillon qui virevoltent à fleur de l’eau. Au bord de la Trême, à la fraicheur du matin, quelques bêtes sauvages viennent s’y désaltérer. Mais, s’il y a encore quelqu’un qui est enchanté de ce grand ruisseau, c’est le pêcheur.

En été, si le baromètre colle son aiguille sur beau temps, elle se fait un malin plaisir de chatouiller les fines jambes des quelques séduisantes demoiselles venues, en cachette, se glisser dans son eau pure. Après ces quelques sottises, joyeuse comme la mésange au printemps, elle remet en route.

Lentement, en faisant frontière entre Bulle et La Tour, elle passe tout près de l’ancien Café du Pont, croise la route qui, de Bulle, va en direction de l’Intyamon. Il court un petit moment le long de la forêt de Bouleyres, puis part pour Broc. En chemin, elle attrape encore l’Albeuve qui coule du Moléson. Finalement, à quelques enjambées de l’ancienne église de Broc, elle se mélange à la Sarine pour s’en aller en sifflotant vers les grands océans.

La Trême est fort polie, mais… prenez garde, car parfois, elle perd la tête. Alors, si vous voyez le ciel s’assombrir et le tonnerre gronder du côté du Moléson, ne trainez pas trop longtemps à sa rive, parce que lorsqu’elle se fâche, c’est une sorcière qui envoie son eau charrier pierres et troncs pour écraser tout ce qui se trouve en travers de son lit.

Bèrnâ Chaney